【本報訊】本港未來的公營房屋建屋量未能達標，學者與民間團體均認為本港其實有大量可發展土地，只是政府受制於建制派利益「唔敢收」，包括粉嶺高爾夫球場及元朗橫洲兩幅地皮，原可提供逾3.7萬個單位，但因遭鄉事派及富豪反對擱置發展。
本身是經濟學者的長策會委員關焯照指，委員制訂建屋目標時，純粹考慮市場需求，「目標定咗，政府做唔到就要問責」。他指香港有很多可建屋的土地，只是政府「唔敢郁」，例如面積達170公頃的粉嶺高爾夫球場，「呢啲無關公眾利益嘅地，要搵地起屋就一定要收」。
政府早前發表在粉嶺高爾夫球場建屋的研究報告，指該處最多只可建1萬個中小型單位，故選擇發展新界東北。

估最多可建兩萬伙

關認為報告過份保守，「有好多方法可以起多啲，例如加大地積比」。他估計該處最多可建2萬個單位，「你收咗佢，即刻解決一半（短缺）問題，差在政府有冇政治能量說服既得利益者」。
公共專業聯盟政策召集人黎廣德指，自董建華年代開始所公佈的房屋政策便一直篤數，無準則可言。他指供應追不上需求主因是當局怯於權貴，未有盡力收地，「明明有地，但係佢（政府）縮沙」。
他指如元朗橫洲的倉地，原定可收回並興建1.7萬個單位，卻因大部份業權屬鄉事派所有，最後全盤擱置，「呢啲地冇環保問題，冇社區影響，（政府）只係為咗維護建制派政治利益，就犧牲公眾利益（擱置）」。
■記者梁御和