「一周兩件」本周起，改為逢周二、三、五為讀者推介。今勻頭炮係重慶機電（2722），該集團由上年半年純利倒退，到下半年大翻身，兼全年度有靚仔增長，PE得5倍。而城鎮化政策，阿爺重點落藥中西部，重機係地頭龍，超級肥仔水，起碼博翻一番。
重機主打發動機、水力發電設備、電線電纜及通用機械，一係涉及國策環保，一係就城鎮化必需嘅基建項目。兩會強調城鎮化，國家開發銀行即做預計，單係未來三年，城鎮化投融資金將高達25萬億銀人仔（5之後有12個0），資金規模非常驚人。
重機嚟緊幾年，輕輕分啲零頭，生意已經不得了。

博翻一番睇2元

再講，總理喺城鎮化「三個1億」落戶上，就點名1億要落戶中西部。剛啱上月尾，韓國現代汽車集團，喺祖國第四間車廠，亦落戶重慶。阿爺重視中西部，外商亦非常睇好呢個地區。加埋重機對口係重慶國資委，有超超強股東背景，天時地利人和，fit到爆。
重機2013年半年度純利倒退26%，得2.2億銀人仔，但全年度純利掉轉頭增長14%到5億銀人仔，城鎮化開始發揮效力。
集團家陣得5倍PE，高達6厘息。又現價（1.03元）相對2010年高位3.3元大跌七成，貼住近5年殘位，得0.5倍PB。睇呢批數據，已經流晒口水。
係咁意估重機今、明年度，EPS增長20%咁大把，明年EPS 0.25港銀，PE得番4倍！又包括由財政部聯合發起，家陣係祖國四大資產管理機構之一嘅「華融」，揸重機H股5%，放長線等食大茶飯。博重機翻一番到兩蚊，預測PE得8倍，升1.5倍到2.5元，PE仍然得10倍！

錢雋
細價股專家
本欄逢周二、三、五刊出