森美今日以玩具大使身份去到灣仔玩具節出席慈善拍賣，仲捐咗一部玩具車出嚟拍賣：「我細細個就儲車仔，以前考試高分，爸爸就會帶我去玩具舖揀玩具車，呢份係代表好同叻嘅標誌，大個咗都繼續儲，依家有百幾二百架，今次捐出嚟呢架都儲咗10年。」

咁多玩具車，會唔會留畀仔女？森美話：「冇喇，佢哋都冇呢啲經歷。個女鍾意獨角獸，阿仔就鍾意打機，我會同佢一齊打機架，會問佢介紹新game，與時並進吖嘛。

「依家湊仔好似追女仔咁0架，要氹佢哋，問佢哋鍾意乜嘢已經唔work，要知道佢哋鍾意乜嘢，生日嘅時候唔使問，靜靜哋買咗佢鍾意嘅嘢，見到個佢收到好鍾意嘅笑容，真係值得。」

聽日就係父親節，森美就話今晚去澳門做嘢，順便帶埋太太同囡囡，當個小旅行，夜晚就同森美爸爸一齊食飯，森美話：「我已經叫咗老婆提佢哋0架喇，尤其係個女，係前世情人嘛，佢送乜嘢都冧。不過我哋冇好似西方咁要驚喜，我哋係好典型，比較香港啲。」森美仲感觸話15歲嘅囝囝 （曦樂Lancelot）最近出智慧齒，佢話：「覺得個仔又長大咗喇。」