惠英紅噚晚係旺角朗豪坊為電影《MRS K》謝票，今次係紅姐最後一部打片，所以佢特別落力，紅姐話謝票對佢來講唔係一啲新鮮嘅事，因為係邵氏年代開始已經要做，當年仲好密，以前午夜場開始，到夜晚9點幾嗰場，就有謝票，所以唔係新鮮好奇，佢仲話：「第一次為呢套戲謝票，係開場前，佢哋未睇，唔知佢哋有咩反應。」講到佢係票房保證，佢唔敢當，亦話唔會理：「我冇理票房，拍戲時，盡咗力就得喇！係好難理會。」

講到呢套戲走埠宣傳，佢話：「之前都做咗，去嗰邊做都好匆忙，馬來西亞留番影帝(任達華)宣傳，佢喺嗰邊仲受歡迎過我。」紅姐話今年中秋香港過，佢好想打牌，問班雀友，冇人應佢，中秋都好似有嘢做，佢最希望之後可以打得成牌。