本地薄裝漫畫仍霸佔報攤一角，據非正式統計，繼續支持老牌武俠打鬥漫畫嘅只係慣性收視中年漫迷。街訪過年輕一族，十個中十個都答有睇日本漫畫，只有三數個支持本地薄裝，一句：「唔知點解睇，買開咪買囉！」唯一有漫迷出口撐嘅就只得幾本黑社會漫畫，尤其《古惑仔》、《耀武揚威》期期都買。因為暴力得嚟有劇情，灑鹽花之餘角色亦有人性，黑社會漫畫嘅作者們，識得玩crossover又識得轉3日刊食住上，已經係最有諗頭嘅一群。

創港產漫畫先河，《古惑仔》喺2003年震撼地由周刊轉為3日刊，即係蠱惑迷一個星期要擺低$28（$14一本）先可以繼續追落去。《古惑仔》編輯Jacky話：「轉3日刊之後無乜跌書，因為我哋無為咁而偷工減料，只係劇情推得更快更刺激。呢個做法其實唔算冒險，因為《古惑仔》已經有一定讀者群，與其開本新書，不如將佢一星期開二。」
《古惑仔》唔只以打鬥為賣點，「社團鬥爭顯現人性真面目、文鬥武鬥都將劇情更加立體化，主角陳浩南亦因應時代、地位而喺性格上有所轉變。」另外，每隔一段時間就會展開新故事，不斷有新鮮感。

黑社會漫畫受歡迎，連一向覺得薄裝漫畫好老土嘅女仔如Tracy一樣追睇：「我開頭覺得係啲臭飛先睇，有一次我仲以為男友買鹹書㖭呀！頭尾幾頁都係啲夜總會廣告，內文重成日有色情場面。」不過有一次，Tracy攞咗本《火紅年代黑骨棠》嚟睇：「發覺又好有劇情喎，打得好勁，畫面血腥但幾刺激，係色情畫面多餘啲。」之後佢仲問男友借番舊嗰啲睇，發現幾本書玩crossover，一個年代會影響另一個年代嘅劇情，最後就同男友一齊追，𠵱家一齊睇一齊講「書經」，感情仲好咗。咦？黑社會漫畫可以帶畀情侶幸福？真係第一次聽咋！