當年今日
關於我們

老公爛滾罰4000萬
籮霸婚前協議明恰班仔

蘋果日報 2002/11/30 00:00


籮霸珍妮花洛庇絲(JenniferLopez)盛傳好快就會同未婚夫班亞弗力(BenAffleck)結婚,由於呢位女歌手曾經離過兩次婚,所以吸取咗唔少教訓,今次醒目好多,重一早搵律師起草一份婚前協議書畀班仔簽!不過籮霸呢份協議,擺到明係益晒自己。

自己唔使罰
籮霸之前嘗過兩段失意嘅婚姻,所以佢今次同班仔約法三章,講到明若然班仔去滾或者有乜行差踏錯導致離婚,會罰款五百萬美金(約三千九百萬港元)!不過籮霸兩次離婚都係因為自己有外遇,但條例又冇話佢去勾佬要罰錢喎!除此之外,今次協議籮霸重列出好多苛刻嘅婚姻守則,要班仔跟到足,呢段感情邊個做主導,相信都唔使我羅拉多講大家都知喇啩!

幾乎衰高買
另外,籮霸可能近排因為籌備婚事搞到暈陀陀,早兩日居然差啲被人拉番差館!點解呢?話說上個禮拜籮霸一個人走咗去shopping,點知佢揀完晒啲嘢之後,二話不說就拎住大袋細袋咁走人,其後籮霸出咗門口,先發覺自己唔記得畀錢,於是佢即刻衝返入去搵店員,好彩籮霸係間舖頭嘅熟客,否則佢又俾人誤會係雲露娜維達(WinonaRyder)第二嘞!