梁君彥噚日喺立法會內務委員會上,突然提出成立一個小組支援中小企應付金融海嘯。呢個問題按規矩應該由工商事務委員會討論,而工商事務委員會主席係自由黨方剛,梁君彥想另起爐灶,所為何事路人皆見,議員個個挑通眼眉,對於兩班人「黨爭」,一於蹺埋雙手等睇戲。
方剛還拖話既然中小企水深火熱,工商事務委員會聽日開會傾都得,可惜之前一直冇人出聲,暗寸梁君彥後知後覺。梁劉柔芬就chock個可憐樣出嚟,話希望大家憑良心講嘢,聲言接獲好多中小企求助個案,邊個議員唔支持成立小組,就好似照妖鏡咁即時現形,對唔住中小企。
梁劉柔芬講到咁盡,張宇人對前黨友都唔使客氣,話自由黨處理好多中小企個案,有人無能為力做唔晒,可以轉介畀自由黨。兩班人公然私片,卿姐睇唔過眼出聲,話議會大把正經事傾,自己人黨爭無謂擺出嚟獻醜嘥大家時間。
條尾俾人踩到正,林健鋒、梁劉柔芬唔再整色整水,惡人先告狀咁款,話根據議事規則,一個議員唔應該猜測其他議員發言動機,否則好有冒犯性;梁君彥則死撐另起爐灶並非要架空方剛,但又講唔出有乜必要另設小組,總之講多錯多,十分捉蟲。