法律界有唔少有明撐、暗撐香港大學法律系副教授戴耀廷等人發起嘅「讓愛與和平佔領中環」行動。勢估唔到，另一個「髮」界都有唔少知音人。但此「髮」不同彼「法」，八方講緊嘅，係領導潮流嘅「髮型界」。原來呀，一直捍衞開戴耀廷個髮型嘅小店理髮師，都好支持佔中行動，仲講到明同幾個同事都會參與其中。

為對得住下一代挺身

八方噚日同戴耀廷傾開，下一波佔中行動，係咪會再有新十死士出場。新十死士會以婦女、工人等基層人士為主，當中會有一位碼頭工人，如果人齊，佢哋到時會搵一間茶餐廳開記招，逐一向傳媒講述佔中心路。其實唔單止商界、社工、法律界同工人撐佔中㗎，連小店老闆都會支持。
戴耀廷噚日講開，話一直幫佢剪髮嘅髮型師，早排都有同佢講，話會支持呢個行動，願意參與其中。呢位髮型師喺大圍經營小店，年齡比戴耀廷細少少，佢同蔡東豪嘅佔中心路差唔多，都係唔想對唔住下一代，唔想等第日小朋友大過咗，反問爸爸當年為民主做過啲乜嘢時，佢唔知點答。所以堅決要出嚟做番啲嘢。
近排佔中人士都懷疑手機被竊聽，戴耀廷就冇有怕，佢話一向講嘅嘢都好公開，就算𠱁老婆嘅肉麻嘢都唔怕俾人偷聽。順便講埋啦，佢嘅電話鈴聲，係《Do You Hear the People Sing？》！

李八方
mailto:[email protected]