港台《第41屆十大中文金曲『用心 • 聽』音樂會》噚晚完滿結束，最優秀流行男、女歌手，分別由張敬軒、謝安琪(Kay)奪得，樂隊Supper Moment就憑《橙海》奪「全球華人至尊金曲獎」(新聞連結： https://bit.ly/2GUxzSW )。

Kay首奪「最優秀流行女歌手」獎，佢話：「好開心!之前都休息咗一段時間，今年作出好多冒險同新嘅嘗試，同埋好感動係樂迷俾我嘅反應，獎項當然係好大嘅強心針，但樂迷嘅尖叫聲，令我內心好滾動，今年同Juno都會繼續做歌，本身計劃都係兩年。」問到點報答呢個新老闆，Kay笑住講：「我哋日日都有互相講多謝，好似今日咁，佢又恭喜我，都唔知恭喜啲咩，不過我哋成日有互相恭喜，我都會更加努力。」

Kay指仔女同老公張繼聰係冷靜派，知佢得獎冇太大反應，笑言反映自己喺屋企嘅地位，Kay解釋：「佢哋通常影咗張相，或者cap咗張圖，仲要唔係影得幾靚嗰隻，send俾我就代表佢睇咗，其實每次老公都話嚟現場支持我，不過我同佢講佢o依家過咗去影壇，你係『樂壇叛徒』，身份好尷尬，佢都係唔好嚟會好啲。」Kay笑言每次出門口前都會逼囡囡講加油，不過囡囡太細，唔知媽咪係做咩工作，佢續言：「有聽我啲歌，有時睇到電視見有人髮型、化妝同我差唔多，就會話『一樣，媽咪靚』。」Kay指嚟緊唔會出席勁歌金曲頒獎典禮：「我哋冇派到歌，因為有啲鏡頭，唔能夠播。」Kay今年去晒各大頒獎禮，一共拎咗九個獎，覺得好喜出望外，佢話：「之後會同公司嘅同事慶功，因為佢哋好努力。」問及今年係唔係最多獎嘅一年，Kay話：「唔係!嗰年《囍帖街》係最大，有二十幾個獎。」

此外，欣宜身穿粉藍色珠片連身裙，笑言呢個造型要扮星，問到覺唔覺得似「麗花皇宮」，欣宜話：「吓!我型少少，同埋唔同造型都想試吓，我就性感唔起，頒獎禮唔試幾時試。」對於今年拎嘅獎項較少，欣宜認為唔代表喺2018年冇努力過，之前同許廷鏗講過拎獎係開心，但係冇獎都要努力，問到點解次次見許廷鏗拎獎都喊，欣宜話：「嗰日(叱咤)係有型，不過我都係好開心，見到屋企人有好成績，始終我哋入行到o依家都一齊經歷咗好多嘢。」

精選娛聞，喺晒《娛果》
http://fb.com/appledailyent