講起英國愛情喜劇，第一時間諗到《BJ單身日記》，當年肥妹仔Bridget Jones真係好入屋，雲妮絲惠嘉（Renee Zellweger）亦演活咗呢個論盡得嚟又可愛嘅中女角色。15年後嘅今日，BJ唔再超磅，冇咗playboy上司曉格蘭特（Hugh Grant），返工都唔再渾渾噩噩，不過，佢依然係單身，仲大埋肚而唔知BB老竇係邊個。可惜觀眾最關心嘅，已經唔係BJ嘅「脫毒工程」進度，而係雲妮15年前後的面貌對比圖。

記者：黃芷蔚

動新聞主播Yvonne日前去咗倫敦親身訪問《BJ 單身日記：生得啦BABY》一眾演員，講起大家喺呢15年間嘅轉變，雲妮就話：「BJ跟我都有好大改變，應該係聰明咗！」而今集新加入嘅美國男星柏德烈丹西（Patrick Dempsey），就幫手答：「你拎咗奧斯卡！（2004奧斯卡最佳女配角）對演員嚟講係好大突破！」至於同雲妮由第一集合作到依家，男主角哥連費夫（Colin Firth）就表示由於太多年冇做呢個角色，今次開拍前都幾擔心，要睇番第一集拎返啲回憶咁話！

BJ以往都係瘦田冇人耕，耕開就有人爭，今集柏德烈丹西會同哥連費夫爭做BB老竇，雲妮當然唔會開估佢最後揀邊個，但就大讚兩位：「真係好難忍到笑，佢哋兩個真係太好笑。」柏德烈就話：「因為我哋拍攝嗰陣特登嘗試戲裏戲外都keep住入戲，同哥連同場就玩得特別開心，佢真係好好玩！」當中有一場係講兩位男主角爭住抱大肚BJ入醫院生B，雲妮個「巨肚」等同三個真實BB嘅重量，連埋雲妮個體重．．．．．．連導演Sharon Maguire都話：「哥連個痛苦樣好真實，應該唔只係演技咁簡單，佢應該唔會覺得好笑，但我就覺喇！」

話說呢套BJ第三集已經籌備多年，觀眾今次會見證埋BJ生BB，應該係完美結局喇啩？但導演就話想睇吓今集反應如何：「我哋都未見證BJ停經！可能會有空間拍呢個故事呢！」難道下集會改名做《BJ 單身日記：停經喇auntie》？