【扮10歲男孩】為舞台劇赴台訓練 糖妹:賺多咗學習時間
糖妹如果我有一個願望
糖妹日前到台灣為幾米舞台劇《如果我有一個願望》試造型,30歲嘅童顏糖妹反串扮演10歲小男孩,戴上藍色短假髮襯粉紅色長褲,造型鮮艷奪目,夠晒浮誇,遲啲將於文化中心公演。
糖妹接受《蘋果》電話訪問表示:「今次反串做10歲小男孩,我要記番自己10歲做緊乜,呢個舞台劇係幾米其中一本書改編,同香港中樂團合作。」原來糖妹要經過試鏡,成功才接演呢個角色:「自己睇咗小男孩故事,跟住再去見導演,喺佢面前唱舞台劇嘅歌,畀佢睇吓適唔適合,先可以做呢個角色。」
糖妹話導演好嚴格,要求佢唱國語、講國語,原汁原味啲:「我睇咗繪本,嗰日影相造型,第一次戴假髮,着特別訂製嘅衫,導演叫我做小男孩嘅動作同表情,一開始自己都覺得會唔會太過女仔,跟住模仿導演嘅行為,因為導演係男人,佢教我點做呢件事,開始慢慢去試,我嚟緊會留喺台灣做肢體訓練,所以我覺得接咗舞台劇,賺多咗學習時間,增值自己覺得好抵。」
更多娛聞,喺晒《娛果》
http://fb.com/appledailyent
糖妹日前到台灣為幾米舞台劇《如果我有一個願望》試造型。