當年今日
關於我們

新都城街市凍肉舖最多行人

蘋果日報 2002/01/09 00:00


位於將軍澳嘅新都城街市,開業唔夠一年,所以地方尚算乾淨,係同區內較為企理嘅一個街市。而因為街市上層商場有一個大型超市關係,喺呢度買嘢都會抵啲。就等小記介紹三間比較大型而又較筍嘅檔口啦,分別係凍肉舖、菜檔及雞鴨檔。其中凍肉舖就經常都人頭湧湧,皆因裏面嘅凍肉實在好平,喺裏面逗留一陣大家分分鐘會捧住一大袋走。而行到攰攰哋,亦可以喺街市內坐低食個包飲杯茶,有個食坊喺正街市入口,方便大家攰嘅時候可以唞唞。
記者:陳冰麗
攝影:關文慧
抵食凍肉
菁霖食品公司賣嘅主要係凍肉食品,喺呢個街市只此呢檔,舖位都相當大,貨品種類多元化,肉類方面有少見嘅無骨豬扒、黃髀,另外重有豬湯骨、急凍雞翼,全部都又平又搶手。
菁霖食品公司(M17-19)
平價雞翼最搶手
雞翼亦係呢度熱賣凍肉之一,其中美國雞中翼更係街坊爭搶購貨,市價至少$20/2磅,呢度只係$16;而巴西雞全翼,價錢重平,大大隻只係$5磅咋!
分量十足美國黃髀
黃髀由美國進口,雞皮及雞髀肉都分布有黃油,每隻都好夠分量,最細都有兩磅重一隻,鍾意食雞髀嘅人呢款黃髀應該滿足到閣下,每磅$5.8,一隻都係十蚊多啲,相當抵呢!
特別推介無骨豬扒
豬扒冇骨實在係值得推介畀大家試,尤其是方便小朋友或老人家食,唔使驚食嘅時候咬親骨嘛!每磅只係$9。
大大件湯骨
煲湯唔少得嘅豬湯骨,$10有三包,每包都有3-4件湯骨,每次煲湯用一包都足夠,除開嚟每包只係三個零,抵到爛啦!
罕見蔬菜
輝記亦係呢個街市唯一一個大型菜檔,近街市出口處,蔬菜價格大眾化,而市面較少見嘅蔬菜好似鮮蘆薈、日本南瓜、鮮淮山,呢度都好易搵到,其中鮮蘆薈重係呢區呢個街市至有咋。
輝記靚菜(M57、M58)
大大棵鮮蘆薈
呢度啲鮮蘆薈夠大棵,一棵棵掛起好易認,可以斷両買,每両$5;買返去起皮,淨肉可以配肉炒食或煲湯、切粒拌果汁食又得。
小量平價日本南瓜
日本南瓜質素都比較高,但價錢較貴,呢度有小量日本南瓜出售,每斤只係$5,比超市平一半有多。
乾淨雞鴨檔
雞鴨檔通常都比較污糟,但呢個檔口地面則好乾淨,令人行過都唔會有生厭嘅感覺,呢度除咗有大路嘅清遠雞、竹絲雞、鵪鶉外,重有最多人買嘅番鴨及鵝,要分辨鴨及鵝,檔主洪生就話至緊要留意個頭,頭有髻係鵝,咪畀人呃呀! 新都城雞鴨(M46、M47)
醒醒你
南苑美食坊係呢個街市特色之一,有粥粉麵、小菜、甜心等唔同美食,大家行到攰可以唞唞食啲嘢。價錢相當平,飲茶食點心為例,兩點前,大中小點$6.8,兩點至五點半,所有點心一律$5.8,即使唔係嚟買餸,飲茶都抵啦!