前港姐冠軍譚小環07年嫁給保險才俊蔡強榮,男方婚後即絕緣,近年小環獲老公支持經營副業,先後在銅鑼灣和尖沙嘴開店賣魚蛋,兩公婆不時恩愛孖咇巡舖。人夫Eric去年被周刊拍到背妻在圓方約中女嘆茶,事隔一年,昨日Eric又被爆夜場強行濕吻艷女連環圖,有指照片攝於4年前,小環和老公至今結婚9年,時間上暗示Eric疑婚後偷食。
有指Eric夜場咀女時,他突然發現有人閃燈影相,Eric瞪眼手指指,不滿被影下罪證。就Eric偷食一事,小環昨日接受電話訪問時說:「我首先同自己講要冷靜處理,每個人見到呢相都會受影響,會唔開心,好正常,我都聽咗老公解釋同道歉,我都原諒咗佢,因為兩夫妻關係好重要。」她直言好形惜這段關係
小環強調心情未平伏,她續說:「我需要時間冷靜,我要有自己空間。」冷靜還是冷戰?小環解釋:「冇冷戰,大家冷靜啫,要畀個腦休息吓。」問小環有沒有深究照片是拍於婚前還是婚後?她說:「冇斟酌,時間唔係最重要,老公唔恰當行為受到警誡,日後飲酒或者應酬,佢都要有底線,睇番自己能力。」她相信Eric爆醉斷片才失控,她說:「斷片玩到咁癲就唔啱。」
問到小環覺得Eric酒量如何?她說:「佢酒量真係好差,如果噚晚飲酒斷片,今日醒番真係會唔記得晒啲嘢。早年佢成日應酬,試過爛醉返嚟,我有話佢,佢心臟唔好,我哋傾過。過去兩、三年,佢真係少咗出去。不過有時應酬在所難免,我都明白。」Eric的藍色A&FPolo恤偷食戰衣,竟被發現與去年陪小環慶生時的上衣一模一樣,小環指Eric衣櫃有不少差不多款式的A&F衣服:「呢點唔重要,佢明白飲醉斷片唔啱就得。」
小環承認已「審問」Eric,她答:「內容保密,私人嘢唔使向外交代。我有叫佢公開場合要行為檢點,唔可以行差踏錯。」小環笑言要拜託狗仔隊代為監察Eric,兩公婆昨足不出戶,小環說:「佢要閉門思過。」小環不想這「污點」影響夫妻感情。
她大方撐老公,Eric也淆底知衰,昨日他在電話中說:「我有同老婆道歉,呢幾年我真係冇乜應酬,近乎零,識我啲朋友都知我唔飲,我花名係『閃電俠』,一叫我飲就閃。」Eric指對夜場咀女照沒印象,他肯定斷片情況下發生,為冧小環,Eric昨公開認錯:「小環向來形象好正面,影響到佢唔好,我好內疚。」