hmv又再轉手。匯友資本（8088）執董胡景邵（Kelvin）2013年以「白武士」身份入主hmv，噚日決定將hmv逾8成股權悉數賣畀蕭定一旗下中國3D數碼（8078），換取對方約23%股權，成為單一大股東。

查實Kelvin與蕭定一本身老友鬼鬼，今次搞呢單刁，似係想一齊食大茶飯喇。
Kelvin喺金融界同娛樂圈一向吃得開，多朋友，佢同蕭定一好早認識，之前hmv銅鑼灣旗艦店開幕，蕭定一都有去到賀，佢公司旗下藝人不時都出席hmv活動。
今日中國3D數碼亦喺銅鑼灣hmv舉行一個電影宣傳活動，韓星李秉憲將會出現，公司旗下藝人王宗堯亦會到，兩位男神駕到，肯定吸引大量女粉絲逼爆門口。
蕭定一噚日都承認，佢識Kelvin好多年，好信任對方嘅能力。匯友資本方面就話，hmv可以用中國3D數碼嘅影片，仲有之前買落嘅亞視版權，兼可參與藝人管理，包括張智霖、周柏豪同周秀娜等，都係中國3D數碼嘅簽約藝員。

胡景邵早想進軍娛樂界

Kelvin曾經想進軍娛樂事業，匯友之前咪試過救亞視，不過無功而還。今時今日嘅零售市道，hmv賣碟、賣潮流產品都唔係咁易做，匯友𠵱家將hmv賣走，夾埋蕭定一嘅一堆藝人資產，可能仲可以殺出一條新血路。

李華華
mailto:[email protected]