【新增內容】

31歲落選港姐李美慧嫁56歲富商曾文豪，一對新人今日在淺水灣舉行婚禮，到場觀禮嘉賓有甄詠珊、陳展鵬、陳志健、李民橋夫婦、楊卓娜、許晉亨、鄭世豪、張彥博、陳爽，楊明、林利、蕭若元、樂易玲同兩個仔、梁婉靜同老公、李綺雯，陳君宜一家三口等。

儀式結束後，一對新人從長樓梯下來，新郎細心扶住大肚老婆落樓梯，落到接近面地時，新娘笑住同老公講：「不如我蹺番你啦！」跟住就挽住老公隻手一齊影相。新娘着住束身腰間透視婚紗，無花誇裝飾，戴住條珍珠頸鍊，手上戴上鑽戒，簡約好睇。

一對新人接受訪問，李美慧開心話：「我哋儀式同普通新人一樣。」曾文豪好合拍咁接住話：「換衫，化妝，嚟到招呼朋友、簽紙。之前講話落雨，好彩今日天氣好好。」曾文豪又話自己嘅仔女有到場觀禮，因為儀式簡約，無安排啲孫做花仔：「兩個女外孫，同一個男外孫都有到齊。」

新娘子講到出嫁心情：「噚日諗住令到自己攰啲，所以出海游水游咗一個晏畫，點知夜晚返到去都係成晚瞓唔着，直到o依家都未瞓過。」心情係咪好興奮？佢笑話：「唔知興奮定緊張，驚啲嘢安排得唔好，好多謝老公。不過頭先台上致辭時，腦中一片空白，唔知自己想講咩。」老公即刻話：「我都有好多嘢想講，怕overrun冇講。」

問到李美慧幾時正式停工養胎？佢就話8月前會完成所有工作。老公有冇叫結咗婚之後唔好做嘢？曾文豪搶住答：「唔會，佢鍾意就得。」李美慧聽到個樣勁冧，挨實老公然後話：「我老公好好。」

精選娛聞，喺晒《娛果》
http://fb.com/appledailyent