八方老闆黎智英噚日到外國記者會演講，到場行家最關心壹電視有乜搞作，是否意味壹傳媒轉型唔做印刷媒體，肥佬黎解釋係大勢所趨，因為新一代由電視同互聯網陪伴成長，多睇影像少看字，所以報紙未來要結合影像才可生存。

有人問佢會否在香港搞電視台，佢直言除非港府「癲咗」，否則唔會發牌畀佢，又指互聯網遲早取代電視頻道，做網上電視台唔使攞牌。講到互聯網天下無敵，第時大家咪活在虛擬世界？肥佬就認為唔會咁極端，因為在虛擬世界嘅接觸唔到肉，「我哋仲要握手，仲要結婚，唔可以只得cybersex。」
7.1將至，肥佬表示會繼續上街，因為只有上街抗爭，先可以要求北京遵守普選承諾。佢噚日幾乎有問必答，承認當年搞admart失敗係自己太蠢，有人問佢入廚鍾意煮咩，佢透露係雞。對於個人安全，佢重申唔信大陸政府搵人殺佢，佢演講後走人，單人匹馬冇保鑣。