於是英國仔奉命招呼歐洲買家。兩日後,市務董事帶買家見紡織A,歐洲買家春風滿面,話香港充滿活力,與香港人做生意好易傾,更多謝紡織A熱情招待,希望彼此以後多啲機會合作咁話。
客人走後,紡織A立即叫英國仔入嚟:「你帶買家喺尖沙嘴、灣仔飲到好高興呀?」英國仔回報:「我第一晚就請買家去金鐘食一流意大利菜,食到十點就問佢是否介意去蘭桂坊飲番杯,佢話唔介意兼且Won'tmindhavingsomethingnaughty。咁就掂啦,我哋一直玩到朝早五點,先至送佢返酒店。第二日下晝五點,佢已經打電話畀我,話要再去蘭桂坊咯。」
紡織A問:「飲酒邊可以飲到天光呀?蘭桂坊好多唔同款嘅酒吧咩?」英國仔咪咪嘴笑:「FCC以西方圓半哩之內,你要乜就有乜,由酒吧、豔舞以至表演,應有盡有,𠵱家就連愛情賓館都有埋,老闆想唔想跟我去玩番一晚?好多律師、會計師、有錢公子、上流人士喺度蒲㗎,保證全港最高檔。」紡織A話:「我十一點就要上床,以後逢有鬼佬買家嚟,由你負責招呼!」