健身中心Pure Fitness母企Pure Group今傳出尋求易手，平時做開運動的用家小飛俠林燕玲表示，3至4個月前加入Pure Fitness做會員，主要在中環一帶的中心上瑜伽班。她表示，Pure Fitness、Pure Yoga環境頗乾淨，午膳或放工時段的瑜伽班都「幾爆」，會員多似中環上班族，尤其平日中午時段，大家一上完就「滾水淥腳咁」離開。

對於Pure Group可能易手，她表示會留意發展，如有更好選擇亦考慮轉會。林燕玲目前簽約一年，月費約1000至1100元左右，年內可無限上瑜伽班及做gym。入會她曾格過價，中環附近的健身中心價格相若，以現時月費除開一個月30日，若每日上堂，即33元一次，對比中環食餐飯「唔算貴」，而且健身中心需要地點「就腳」，故暫時未打算轉會。

記者：卓茗