羅霖啱啱喺長沙同上海返港，仲話自己最近好忙，問佢係唔係離開咗亞視之後多咗嘢做？羅霖就話：「我要澄清，我同亞視冇約，之前係義務，十幾年都冇簽，個個人都以為我簽咗，不過嚟緊搵我做『亞洲先生』評判，我同監製熟，有機會做，不過都驚，費時又傳嗰啲嘢。」

咁講係唔係擔心同亞生傳緋聞呢？佢好直接咁話： 「避都避唔到呢啲桃花，雖然桃花係觀眾緣，但真桃花就冇咁快，要努力兩年先，0依家都有好多(指追求者)，啱啱先拒絕一個，之前拒絕咗幾個，暫時都唔想住，我會好決絕同人講唔想。」

講到發牌事件，佢認為有更多競爭先係好事，會令到呢行百花齊放。但係有唔少網民都想亞視摺埋，佢就話： 「亞視要努力，好似嚟緊有劇集，咁對幕後同藝員都好，一路以來都想佢哋拍多啲劇。」

當講到連陳啟泰都離巢時，佢就好失望咁話： 「好可惜，佢係好出色嘅司儀，大家都有合作過，冇佢好可惜，亞視應該挽留人才，希望亞視會好，永遠都係希望囉。」

另外，孫佳君噚晚戴帽睇戲，佢就話最近成日戴帽。近日拍完手頭上嘅電影之後，就會幫港台拍節目，對於發牌事件，佢話：「發一個牌，得益係觀眾，政府唔發有原因，睇佢講出嚟大家接唔接受。」