噚日雖然係星期日兼父親節，但為官者如勞工及福利局局長張建宗，不得不連走兩、三場公開活動，但好彩佢仲抽到個朝早出嚟，同啲仔女歎吓早茶，並且由仔女出錢請老竇，應該係最實際嘅父親節禮物。莎姐就送咗個名貴旅行篋畀老公做禮物，等成日出差嘅另一半有個又輕又靚嘅篋可用。

至於經常周圍飛連老竇楊孝華都未必搵到嘅候任教育局局長政治助理楊哲安，做咗官好似踏實咗，上星期五已經同老婆張燊悅約老竇食飯預祝父親節。楊孝華話新抱仔送咗大大包禮物畀佢，但仲未拆，所以唔知係乜東東。
至於民主黨三個第二梯隊成員，噚日都搞咗個父親節活動，胡志偉、張賢登仲帶埋自己嘅囝囝出嚟，講吓平日點樣同佢哋相處，聽落都幾溫馨。胡志偉話，囝囝雖然已經11歲大個仔，但兩父子依然經常會攬吓錫吓，囝囝有乜秘密都會喺夜晚瞓覺前話畀佢聽。至於張賢登，喺活動上唔停咁同仲未夠年齡返學嘅囝囝玩波，仲要預先整件餅畀囝囝食，點睇都係廿四孝老竇一名。