彭秀慧主理嘅舞台劇《29+1》，晚上喺演藝學院再度公演，吸引容祖兒前來捧場，不過祖兒到場就唔接受訪問，此外仲有洪卓立、湯怡、林欣彤及林一峰都有現身支持。

演出完成後彭秀慧接受訪問時表示，今次《29+1》已經係自05年嚟第11度公演，佢話：「今次演出13場，計起上嚟已經係第92場嘅表演。」問到自己對演出係咪已經駕輕就熟？佢話：「都唔係嘅，每次公演都會有少少改動，但主要骨幹對白就唔會，始終《29+1》呢個故事已經入咗我血。」

憑住《29+1》電影版獲今屆香港電影金像獎提名最佳導演、最佳編劇及最佳新晉導演嘅彭秀慧，問到對攞獎有無信心？佢話：「無諗咁多，獎項都唔係自己控制，而且目前亦要專注演出。」佢仲透露要做完今次公演後先準備金像獎當晚嘅戰衣。

彭秀慧又笑言：「一次過提名三個獎項，可能到時會緊張到心臟病發。」問到最希望攞到邊個獎？佢話：「如果真係諗嘅，我會希望係編劇，因為呢個劇本由05年開始呢十幾年嚟得好多人鍾意，仲有人話因為呢個劇本改變咗自己人生，所以真係想嘅話我會希望憑劇本攞到獎。」

精選娛聞，喺晒《娛果》
http://fb.com/appledailyent