【新增動新聞】
銀河唯一出超必，都係唔夠瑞典揪！周五世盃外歐洲區A組，法國雖然有「銀河唯一」基奧特左腳抽射世界波開紀錄，點知門將洛里斯完場前致命犯錯，結果俾主隊瑞典反勝2:1，兩軍同樣6戰13分下失埋榜首位，出線形勢急轉直下！

法國為咗力保首名強陣出擊，保羅普巴、皮耶、基沙文等悉數正選披甲，37分鐘基奧特更喺左路禁區「畸角位」左腳控高再狂抽遠柱入，為「高盧雄雞」開紀錄。不過，瑞典4分鐘後就憑效力法甲圖盧茲嘅占美杜馬斯禁區內無人看管下勁射扳平。以為雙方和氣收場，點知洛里斯喺完場前10秒接應回傳無端端控多腳出禁區，喺對手前鋒力逼下草率解圍，結果托禾倫喺中場線第一時間射入空門，為瑞典絕地反勝2:1完場，難為洛里斯抱頭後悔已太遲！