近來荷李活性醜聞一單接一單，連奧斯卡影帝卡斯亞弗力（Casey Affleck）嘅陳年舊聞都被拉落水，有人就於網站發起網上簽名運動，要求美國影藝學院（Academy of Motion Picture Arts & Sciences）禁卡斯出席今屆奧斯卡頒最佳女主角獎。

美國製作人Cameron Bossert最近於Change.org發起網上簽名運動，指「有鑑於Harvey Westein數十年性騷擾、侵犯女性，美國影藝學院最近已經投票將Westein從會員中除名，但大家知道嗎，還有一名遭控性騷擾的成員將參加2018年奧斯卡。」網站已募集超過17500個簽名，對此卡斯並未回應。

憑《情繫海邊之城》（Manchester by the Sea）獲影帝的卡斯亞弗力曾被兩名女子指控於2010年性騷擾，包括女監製Amanda White指拒絕同卡斯過夜之後冇糧出，又指卡斯曾叫工作人員向佢露械，又同佢大談性經驗，更暗寸佢一把年紀「係時候要有 BB」。在哥斯達尼加拍片期間，卡斯又要求 Amanda同佢同房，被拒後竟遭卡斯粗暴捉實迫使其就範，事件告上法庭，最後庭外和解。