當年今日
關於我們

馮仁昭四圍超:傅珮嘉食完白果食生日蛋糕

蘋果日報 2002/01/15 00:00


無綫《勁歌》頒獎禮前晚曲終人散,冇份攞獎嘅歌手,好似慳妹傅珮嘉(Maggie)都有去慶功宴。但馮仁昭一去到就見Maggie逗留咗幾分鐘就急急鬆人,以為佢係因冇癮而走,問清楚先知原來噚日(十四日)係佢生日,所以要喺凌晨十二點切生日蛋糕前趕去為自己慶祝。

柏芝致電祝賀
Maggie班朋友一早已經喺銅鑼灣皇室堡加州紅卡拉OK開定房等佢,佢重用極速時間將紅色戰衣換番casualwear去慶祝二十三歲生日,嗰晚同佢慶祝嘅朋友有歐倩怡、VRF,重有柏芝個緋聞男友劉浩龍。劉浩龍攞住個咪好鬼投入咁扮周杰倫唱《龍捲風》,而周永恒同梁浩賢去完Maggie個生日派對之後,又返去尖沙嘴參加許志安個卡拉OK慶功派對。
前晚Maggie收唔少禮物,連瞓喺醫院嘅老友柏芝都有致電畀佢講聲HappyBirthday,佢哋重係好姊妹,Maggie當日去探病食閉門羹,只係柏芝瞓咗覺啫。

陳冠希搬屋學獨立
陳冠希(Edison)一向同佢爸爸陳澤民以及兩個家姐,住喺港島區羅便臣道兩個相連單位。但馮仁昭收到風,Edison最近忙緊搬屋,準備自己一個搬出去住,雖然未知今次Edison係自己置業,抑或係租屋住,但佢大個仔想自己獨立一下,都未嘗唔係一件好事嚟嘅!
《天下無雙》搞噱頭開騷
繼上年王家衞套《花樣年華》喺內地上映時搞個旗袍展之後,今年佢套《天下無雙》一樣會喺內地搞啲噱頭宣傳。聽講套戲嘅主角王菲(圖左)、梁朝偉、趙薇等個個都係唱家班,所以打算喺內地開個《天下無雙》演唱會。馮仁昭重知道,阿菲喺戲裏面會唱黃梅調,所以到時佢喺個電影演唱會中都會一顯佢嘅黃梅調歌喉。

趙金卿放鄭紹康一馬
蘭桂坊集團個公關鄭紹康,早排俾馬薛芷倫(Fanny)公開鬧佢借Fanny之名賣二手衫。原來除咗Fanny之外,趙金卿都為此心生不忿。話說趙金卿啱啱同朋友呻,話俾鄭紹康擺上枱,情況同Fanny一樣,不過佢就選擇「骨」一聲吞咗佢。因為佢覺得對方已經俾Fanny鬧到面懵懵,唔想再落井下石,不過佢話若再有下次,就一定會好似Fanny咁,公開數佢不是。

賭王女婿賭網似內衣Show
賭王何鴻燊女婿搞嗰個網上博彩遊戲DrHo.com,最近又搞搞新意思,話說呢個網頁一向有啲性感女荷官二十四小時即場派啤牌,而呢班女荷官最近全部換晒美國著名內衣牌子VictoriaSecret嘅性感內衣上陣,真係好似做內衣時裝表演一樣!