公開考試過後，畢業典禮之前，又到一年一度謝師宴嘅日子。打住感謝老師嘅招牌，成班同學仔穿上西裝禮服，喺鋪張得過份嘅酒店廳堂，爭相合照打卡，拉住地中海陳伯、獅子頭等師長合照。一夜之間，老師在宴會廳內得到的注意力，比整個學年還要多。即便如此，有啲老師仍然係好乞人憎，憎到喺呢個最後嘅日子，都得唔到人愛戴，例如飯鏟頭。

「我一陣一定唔會同飯鏟頭影相㗎。」上咗車之後，坐喺後座中間嘅短馬尾頭同學表示。佢坐中間又唔挨住椅背，喺車廂中心呼喚緊，特別引人注目。附和得佢最快同整齊嘅係護持兩邊嘅同學，特別係坐左邊得約干黃色布料包住嘅包包頭同學，上車前明明大家差唔多高，上車後矮咗落去。「直情唔會行埋去佢附近啦，臭㗎。」包包頭同學對飯鏟頭嘅描述，喺我耳邊炸起一輪笑聲，三個女人一齊笑，對耳膜真係會做成實質傷害，即使只係幾個唔夠二十歲嘅小女孩。「佢成日留到咁夜，都唔知返到去有無沖涼。」坐我後面嘅女仔，膚色白得驚人，果然年輕就係最好嘅護膚品，可惜口舌
不饒人。

「你又知佢留到咁夜？」帶住嘻笑嘅質問，出自馬尾頭同學同包包頭同學。面對意有所指嘅指控，白雪雪同學即刻澄清：「咩呀，我上次帶中樂團帶到八點，先見到佢仲未走咋。」「咁你有無⋯⋯」「無呀，我見教員室仲有燈，過去睇先知係飯鏟頭，仲改緊MOCK卷，都無人理㗎啦。」無論朋友，老師問咩，答「無」似乎係標準答案。「問你有無埋去扭扭下喎。」「咩呀，無呀。」少女嘅打罵聲中，一個飯鏟頭嘅身影，逐漸喺我心中成形：古早味濃嘅風褸，衫永遠緊緊咁攝喺褲入面，趕完校務會議紀錄，終於可以改卷。就考公開試，我一定要改埋份MOCK。沖好嘅提神咖啡熱到飲唔到，攤一攤凍先，一攤就係大半晚。改完卷已經九點，頭先話佢走先嘅同學，係七點嚟定係八點嚟嘅呢？喺不停重複嘅工作中，時間實在唔容易分得清，但至少，聽日有卷派。

忽然一陣濃香傳來，香水被幾個小女孩當空氣清新劑咁大量噴灑，同飯鏟頭一樣被虛耗浪費。「你睇下我個假眼睫毛痴得好唔好？」短馬尾頭同學用手指硬撐開對眼，邊個欣賞佢貼嘅假眼睫毛，就同時要同佢嘅瞳孔對望。「你邊駛痴呀，啲眼睫毛長到插眼喇，等我同你搣咗佢啦。」包包頭同學唔係講笑，真係出手插眼，短馬尾頭及時一手格開，如果我呢個時候嚟個急煞……真係諗下都覺得危險。

「睇下，係飯鏟頭同地中海陳伯喎，仲有獅子頭呀。」白雪雪同學指住地鐵站出口講，我以為會望到幾個奉獻大半生喺教育嘅中年男人，但其實飯鏟頭係個頭髮略見灰白，同髮型唔知點解向兩邊擴散嘅女人，睇樣實在大唔過我好多。格鬥中嘅兩個同學更加無留意窗外嘅人，而且目的地嘅酒店亦都近在眼前。

三個女仔落車後，快步走入酒店，開始掌握著住高跟鞋追車嘅步伐，避免同飯鏟頭等人一齊搭升降機嘅尷尬。緩緩行過嘅飯鏟頭等人雖不至於垂頭喪氣，但係都有氣無力咁，返咗成日工仲要嚟食自助餐，分分鐘仲未續到下個學年嘅合約，精神飽滿係無咩可能嘅事。謝師需要嘅係心態，而唔係生蠔；老師喺教員室嘅昏黃下改卷時唔去多謝佢，搬佢嚟水晶燈嘅光環下，謝意亦都唔會加深。咁貴食一餐飯仲要多數唔好食，我估老師寧願你留返啲錢第時交學費。不過無論參加謝師宴嘅同學有無心都好，酒店都係有得益嘅。

專欄作者簡介：
白告
我的文字你的故事紅的車廂，我的你的紅的。

Facebook專頁：
https://www.facebook.com/lazytaxi

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland