近幾日嘅怪事，似乎對後市呈頗深層意義。

美國對進口鋼鋁徵關稅，單嘢對中國鋼鐵業影響極微。中國鋼材出口佔總產量唔夠一成，由於美國老早向中國鋼鐵實施制裁，令到近年出口至美國嘅鋼材數量大跌，根據中國海關，嚿年中國鋼材得百幾萬噸出口至美國，相對以億計嘅中國鋼材總產量，實在不具意義。侵侵明知習近平兩會忙於搞永續主席之位，於是呢幾日先敢咁得戚。

呢個時候，侵侵發Tweet話「貿易戰係好事，因為美國能夠輕鬆取勝。」呢句話市場信以為真的話，殺傷力非同少可，換轉係2月中講同一番話，相信美股會死咗，但今次美股即日已回穩。

話說，特朗普開始籌措連任班底，假如呢吓亂嗡嘢隊冧個市，共和黨內想搵人埋堆都難。究竟點解特朗普咁放心亂嗡嘢？係咪曲線話你聽，有個美國總統覺得個市穩陣到點嗡都唔再冧？

那邊廂，聯儲局主席鮑威爾話，美國經濟冇過熱，回應IMF拉加德話美國經濟可能會過熱嘅睇法。就嚟退休嘅紐約聯儲總裁杜德利食咗誠實豆沙包，話加4次息都合理。正正係一年加息4次呢個訊息太誇，就反映經濟過熱並非空口講白話。倘若經濟過熱，即使加多幾次息，到時股市都可能按捺不住一齊過熱。相反經濟冇過熱，加息次數少過預期，股市亦似乎無壞。呢個位，再返轉頭思考吓點解侵侵放心搞事，局勢似乎明朗化一點了。

晋佳
http://www.facebook.com/advanceguy1/