當年今日
關於我們

中環在線:K寶阿叔有壓力

蘋果日報 2006/06/06 00:00


仲有幾日,4年一度嘅世界盃就正式開波,除咗一眾球迷、馬會呢個大莊家同埋一眾打不死嘅外圍佬,最開心莫過於「冧莊」攞到獨家直播64場賽事的有線K寶,梗係啦,廣告爆晒,臨開波仲有大把客仔排住隊等裝機幫襯,難怪佢哋單位辦事人吳天海笑到唔停得口!
海哥話,𠵱家仍繼續有熟客仔想加碼,佢哋都頭痕諗緊計,而廣告額呢就已經比上屆升咗1成以上……咁多咗幾多客仔?佢話上屆開波前後平均每個禮拜上6000至7000個新客,今屆都差唔多,臨開波呢幾日最關鍵,師傅一日開足25個鐘頭工都做唔切……完全紅牌阿姑應接不暇咁款!
開心還開心,計華華睇今屆K寶上下應該仲辛苦過上屆,第一、珠玉在前,上屆咁成功(尤其係個玩足1個月嘅嘉年華會)今屆豈能有失。
對家亦步亦趨
第二、𠵱家有二少檔now呢個亦步亦趨嘅對家,更加唔可以衰,難怪一向風度翩翩嘅海哥,噚日響九龍灣展貿主持嘉年華場館啓用儀式嗰陣,都搖身變成K寶阿叔,話有壓力,而壓力要響星期五開波之後先解決到!
李華華