湯怡、衛詩雅同吳浩康今朝一早到元朗大欖郊野公園，會合楊受成太太擔任《善寧會登山善行》起步禮嘉賓，三位藝人本身都係熱愛跑步運動，衛詩雅分享行山奇遇，佢試過有朝冇㩦帶任何隨身物品，就由屋企後山行山，佢話:「我仲以為自己好聰明，明明跟住啲牌行，點知唔知行去邊，仲要見到豬同羊，最後行到一邊公路邊。」由於無錢無電話，佢唯有截的士向司機借電話向媽咪求救，可惜媽咪無接電話，最後幸好的士司機信任車佢返屋企拎錢，自始就唔敢再兩手空空獨自行山。

湯怡指平日跑山時通常都要追男仔，全因同行男性友人體能太好，至於男友洪卓立就唔會參與，最多只會一齊行山，或者相約終點等候，日前2號係洪卓立生日，問到湯怡怎樣跟男友慶祝？佢內疚話:「今年自己有啲唔好意思，我唔記得訂蛋糕，要補番畀佢，不過仲未補。」吳浩康自言一向對情人節、聖誕節，甚至乎拍拖紀念日都唔記得，仲試過唔記得咗就側側膊當冇事發生。

精選娛聞，喺晒《娛果》
http://fb.com/appledailyent