如果每畀人提起個名就會打一次乞嚏，呢兩晚「小鳳姐」徐小鳳個鼻一定忙過阿寶。事關網民連續兩晚分別去到鍾樹根同葛珮帆辦事處出面，大唱佢嘅首本名曲《喜氣洋洋》慶祝兩個人連任失敗。

正當大家喺馬鞍山「熱烈地彈琴熱烈地唱」嘅時候，浸大新聞高級講師呂秉權今晚就喺又一村嘅超級市場度，巧遇戴黑超披肩紗嘅小鳳姐真人。咁難得撞到，做咗記者咁多年嘅呂秉權梗係唔會放過機會，即刻問佢點睇網民用佢首歌同Tree根贈慶。

小鳳姐就話，自己啱啱返香港，無留意區選，對於播歌覺得心情複雜，希望畀人播嗰嗰（即係Tree根）唔好嬲咗佢咁話。嚟到呢度本來以為EndTopic，點知呂秉權同八方講，小鳳姐居然主動提起上次劉江華都畀人播《喜氣洋洋》，話啲人真係曳曳。