講開KD,除咗確定就快復出,佢周三都成為咗另一單球壇大新聞嘅主角之一。聯盟之前簽咗由2016/17球季起生效、九年總值二百四十億(美元,下同)嘅電視轉播合同,即係平均每季電視轉播收入超過廿六億,到時每隊嘅薪酬上限就有機會上到九千萬,比起下季預計嘅六千幾萬多一半!聯盟就提出「平穩度過薪酬上限上升」嘅方案,希望將大幅提高嘅收入平均分配畀所有球員,人人都有人工加,唔只得小部份球員受惠。但係一班賺開頂薪嘅球星又點會肯蝕底,所以球員工會已經拒絕咗聯盟嘅方案。
而KD同勒邦占士(LeBron James),就係二○一六年夏天兩位最大牌嘅自由身嘞。下季年薪同樣超過二千萬嘅佢哋,簽咗新嘅頂薪約之後年薪有可能升到三千萬!但身兼球員工會副主席嘅占士就懶神秘咁話:「我哋會喺夏天開會,一個好重大嘅會議,去討論大家想點處理件事;但𠵱家未係時候。」