中原地產創辦人施永青唔單只把口叻，原來游水仲叻，噚日就以62歲年過花甲之齡參加咗維港渡海泳。佢自爆卅幾年前仲係年輕力壯時都有參加，當年正值維港最污糟之時，成個賽道都係油污垃圾，諗起都好鬼得人驚。
相隔33年後再游，施老闆大讚水質好過76年嗰陣好多，至少啲水清咗好多，但體力就明顯唔及從前，游完1.8公里已經好鬼攰。佢噚日同幾位老友記齊齊落水，雖然游畢全程，成績麻麻，差唔多包艇咁滯，但體育精神就認真可嘉，事關施老闆呢頭游完渡海泳，嗰頭就趕去維園出席《城市論壇》，講起佢最緊張嘅居屋問題仲好夠中氣，睇怕家啲後生仔都冇佢咁好氣。