【《戰狼3》定《狂野時速9》】雲迪素都爭住合作 京爺殺入荷李活?
狂野時速戰狼吳京雲迪素
手持一本中國護照嘅吳京,憑佢套自編自導自演嘅《戰狼2》,人氣衝到上太空,套戲喺大陸勁收逾56億人民幣票房之餘,佢套戲之前仲代表大陸報名角逐奧斯卡最佳外語片提名,嗰股氣勢梗係爆燈啦。
不過都未算,估唔到連《狂野時速》(Fast and Furious)嘅荷李活巨星雲迪素(Vin Diesel)都要俾面京爺,今日就喺佢facebook度上載咗條片,仲用中文留言「Wu Jing…兄弟…Brother。All love。」添!
條片入面,兩個大隻佬雲迪素同京爺近鏡對住鏡頭,搭晒膊頭咁鬼咁親切,一開始京爺就教雲迪素講普通話「哥們兒」,只見雲迪素模仿咗幾句,都勉強叫做合格啦。不過重點唔係普通話,而係雲迪素喺鏡頭前宣佈兩人嘅合作:「很榮幸我們可以一起合作,會有一些很特別的東西帶給大家。我們也很互相尊重對方。」京爺之後再用英文說:「你們將會看到全新的雲迪素!」
對於兩大巨頭合作,大陸網民都極之振奮,有人話如果吳京係《狂野時速9》嘅主角,票房就不得了。令人意外嘅係連外國網民都話好期待兩人嘅合作,似乎《戰狼2》嘅威力真係唔惹少喎。
雲迪素喺fb上載短片,話要同吳京合作。(網上截圖)