係咪個個男人都得一想二？出街就想拖住個瘦身索女，入房又想女友夠肉地滿足手感。點解咁感觸？皆因香港首個性文化節明天就開幕，星期一開始仲有室內性展覽，屆時5代Mary吹氣娃娃同堂參展，細數歷程。咁突破性，小記今次率先帶住其中兩代「性女」肥瘦代表，把臂同遊銅鑼灣鬧市，連同其他Mary玉照，做個選美Preview，結果竟然係……吓？嬌美不及肥肉吸引？
記者︰劉昱蘭
攝影︰周旭文、陳陶鈞
Model︰So、Wysam（Salvador）

5代性女逐個睇
*第1代

香港兆邦洋行老本行係做塑膠產品，70年代尾首次製作的吹氣Mary，造型參考玩具，所以頭髮部份係假髮，都幾Cutie！拎佢出街好受歡迎，有男士即刻同佢合照！

*第2代

第二代Mary想寫實啲，參考真人製作，但頭髮反而以絲網印刷，臉容都平面咗，但身材突出誇張咗！

*第3代

去到第三代，再參考真人製作，面立體而有輪廓，但啲頭髮都係平面印上去，手感爭緊啲。

*第4代

由頭髮到身形，都開始與真人相似，手腳冇吹脹咗的感覺，但睇落又似番公仔喎。

*第5代

2000年，生產商收到一名男士來電，要求廠方製作一位肥婆，肥版Mary隨即破格登場﹗

街頭直選！3比3平手

比細節——肥Mary勝

嘩﹗3比3打成平手喎，咁睇嚟要首席評判（是日Model）阿So評頭品足，12碼定勝負。

頭髮眼睛　瘦版勝！

瘦版落本用假髮，加上瘦版眼影夠Sharp！

嘴巴　肥版勝！

阿So親手深入試探，肥版深度佔優。

膊頭、胸部　瘦版勝！

肥版夠闊好瞓，胸部更加係蚊同牛比。

雙手　瘦版勝！

瘦版雙手微微上提，有擁抱感覺。

腰部、臂部　肥版勝！

肥版有肉地好攬，更有股罅誘惑。

結果：呢Round3比2，肥版Mary贏！唔信服賽果嘅，周一去上環性展覽自己印證吓啦！

絕密佳麗　港男個個話買

除咗5位，其實重有一位絕世佳人，但佢今次冇參展，咁惟有畀啲相大家望梅止渴。點知一睇就不得了，引死一班港男，個個當出爐冠軍肥Mary冇到，爭住話有貨的話唔理幾錢都買……如果老婆女友批准的話。乜料咁堅？其實呢個叫Realdoll，並非吹氣（而是使用實心矽膠，郵購的話郵包重150磅），製作如此精美價錢當然有番咁上下，女版賣$6,499美金（即五萬多港元，另加$850郵費，男版要賣$6,999㖭！）製作商聲稱只在網上販賣，不作店內公開出售，想買？自己上網Search啦！
不過生產5代Mary的香港兆邦洋行董事總經理藍兆文話，絕世佳人淨係引到港男，老外都係鍾情Mary︰「外國人唔鍾意以信用卡在性商店購物的記錄留底，寧願平平地畀現金好過。」

茜利妹：外國性商店如「些粉」

其實以上的Mary都是由香港兆邦洋行製作，亦即性文化節的其中一間參展商，場內絕大部份的成人用品，幾乎都係兆邦一手包辦，皆因佢係老行尊，有20多年生產經驗。藍生放眼全球市場，產品幾乎全部外銷，香港只佔0.5%左右，少得可憐，香港真係咁保守？喺外國讀過書的茜利妹都話︰「外國的性商店真係成行成市，重要係24小時營業。啲Sales真係會好正經咁同客人交換用後感，客人唔會閃閃縮縮。記得香港1998年喺太子有一間開張咁大把，已經好似好大件事咁。咁係因為外國人正視自己的性需要，港人就多數只會壓抑。」藍生希望性文化節中的各方專家論壇，能令港人多啲正面地談性，唔好咁保守啦香港人！

中學生：「水沖可避孕？」

性教育促進會副會長吳敏倫教授話，青少年現有的性知識，不足以應付日常性問題。港台《性在有心》主持程翠雲見過嘅Case都幾離譜，例如中學生以為性行為後用水灌陰道可避孕，第一次性交唔會有BB等等，真離譜！記者測試過，原來連大學生都有好多錯誤觀念！

大學生小測試

問︰如男性長期無射精，精子會怎樣？
Chris答︰「隨小便排出體外。」
正確答案︰睪丸會吸收精子，身體自動回收。性腺的分泌則會隨小便排出。

問︰女性MCome時有何禁忌？
Frances答︰「唔可以性交。」
正確答案︰其實性交冇問題，只係會較易受感染或較易發炎。