龐景峰同前女友楊埕，噚晚都有出席灣仔Hong Kong Tatler晚宴，之前女方講佢哋發生過肢體碰撞搞到分手，噚晚又一齊到場，唔通復合？點知兩個人唔夾口供，一個話係，一個話唔係。景峰起初話唔係復合，又話同楊埕一向係朋友，成日都喺埋一齊，但唔想講太多感情事。但女友就自爆係景峰努力追番佢，之前係分咗手有一段時間。楊埕之前講過話同景峰有肢體碰撞o架喎，呢次佢就話：「其實好少事。」景峰搭嘴話自己一向好calm，唔會用暴力，從來冇暴力過，仲為自己申訴：「我真係冇郁過手。」楊埕即刻幫男友，改口風話：「係有小小碰撞，瘀咗小小嘅啫!」

而同場嘅莫文蔚，講到近況，就話最近成日飛嚟飛去好忙，早排做《我們來了》真人騷，早兩日至喺新疆返：「8個女仔參加，仲有劉嘉玲、趙雅芝、謝娜等，挑戰唔同嘅嘢，例如跳民族舞，揸四驅車。」面對咁多女神會唔會蝕底?佢話：「唔會，大家好愛大家，玩到癲就有，同嘉玲識咗好多年，但首次合作真人騷，我哋好投契。」至於佢位舊愛馮德倫同舒淇結婚，莫文蔚大方話絕對會送上祝福，亦唔覺得意外，真係開心事，有親自send message恭喜。不過問到會唔會送禮或者約食飯，佢就明顯有啲避忌，話太難約期，唔需要太刻意送禮，總之送上衷心祝福。