今晚澳門美高梅劇院舉行盛大派對，美高梅聯席主席兼執行董事何超瓊邀請到澳洲天后Kylie Minogue擔任表演嘉賓，其他到場嘉賓還有澳洲男星廉安咸斯禾夫（Liam Hemsworth），韓團Super Junior成員崔始源、台灣男星吳尊、被譽為泰國最美變性人嘅Poyd、何家千金超鳳、超蕸，以及何正德林恬兒夫婦、林愛愛、樂基兒（Gaile）等都有現身，場面非常墟冚。

何超瓊戴住后冠現身，並與首位行上紅地毯嘅嘉賓始源握手問好，仲乘機集郵。大會限定崔始源只會回答4條大會指定嘅問題，首先問到佢去澳門嘅印象，始源話：「嚟過好多次，但單人就好耐冇嚟，大韓民國嘅國務要當兵，自己完成之後都嚟同大家見面。」至於對澳門嘅印象，始源話：「係中西文化交流嘅中心點，睇到文化遺產，景色好靚，可惜今次嚟到無法四圍觀光，知道有好多靚景同美食。」佢仲話自己參觀咗其中一間朱古力店，又覺得啲藝術品好新奇。問到佢有啲咩想同澳門fans講，始源話：「其實好快就嚟做演唱會，期待演出。」始源再提到嚟緊會多啲同大家見面，5月就會喺澳門舉行Super Show 7。

至於吳尊，佢話今次忙住工作冇帶家人同小朋友過嚟，今次嚟會住兩晚，仲話自己都有好一陣子冇嚟澳門，上次約兩年前，帶住大女Nei Nei嚟出席活動，佢話Nei Nei上次嚟玩得好開心，所以好鍾意呢度，問吳尊會唔會抽時間去賭場行一轉碰運氣？佢話：「目前未有時間。」提到佢早前喺情人節首度公開夫妻合照（新聞連結： https://bit.ly/2DRNQkT ），吳尊坦承係有啲突然，佢話係貼相前兩日突然有呢個諗法，仲話平日偶爾都會同太太傾呢個問題，覺得可以同大家分享吓，加上係情人節，其實太太都OK，但因為太太好緊張張相入面個樣，曾經叫過吳尊唔好放，但吳尊覺得冇所謂，因為佢覺得兩人由1996年一齊至今，已經咁耐，所以可以公開。

吳尊話公開張相後，反而係啲朋友嚇親，驚係啲相唔小心泄漏出去。講到佢P圖，佢澄清自己只係鍾意P文字，但唔會P個樣。另外，問佢會唔會一家人去真人騷，吳尊坦承有再同《爸爸去哪兒》嘅製作組傾過，其實太太都上過，不過嗰次因為太太感冒，唔想傳染人，所以戴口罩現身，而且唔習慣，而Nei Nei就好想去參加，但吳尊話叫個女都係返去讀書好啲，佢仲爆個女成日想同啲女仔玩，吳尊話：「幸好她喜歡跟女生玩，跟男生玩就頭痛，還是跟我玩好了。」

精選娛聞，喺晒《娛果》
http://fb.com/appledailyent