劉嘉玲最近為水晶首飾行天橋後，獲贈一個新款的水晶手袋，她亦是該品牌首個獲贈水晶手袋的亞洲女藝人。嘉玲表示有意用這個「幸運」手袋，陪男友梁朝偉出席台灣金馬獎頒獎禮，希望為對方帶來好運。

劉嘉玲日前在廣州為水晶品牌施華洛世奇行天橋，在示範完一對很重的水晶耳環後，嘉玲笑言有「飛甩耳」的感覺，她說：「係真嘅，我隻耳仔之後重發炎，好彩唞吓就冇乜事。」

最襯頒獎禮
不過嘉玲辛苦亦有價值，由於該水晶店經常贊助國際女星水晶手袋，女星更會挽水晶手袋出席奧斯卡頒獎禮，大會知道劉嘉玲喜歡收藏水晶飾物，故特別送了一個DanielSwarovski的水晶手袋給她，而她亦是首位獲此優待的亞洲女藝人，令嘉玲特別開心。
嘉玲日前說：「我覺得個水晶手袋好靚、好閃，所以用嚟配襯晚裝去晚宴最合適。」男友梁朝偉有份角逐今屆金馬影帝，嘉玲謂希望可陪偉仔赴會。問嘉玲到時可會挽這個手袋出席，她說：「我諗都會，但要睇吓我之前搵唔搵到晚裝去配。我都知外國女星去奧斯卡鍾意拎呢類型手袋，以顯示佢哋嘅貴氣。」

愛藏貓水晶
其實嘉玲一向都喜歡收藏水晶擺設，她說：「我尤其鍾意嗰啲貓科動物，好似老虎同貓仔，好鍾意佢哋嘅神態。」嘉玲家中特設專櫃放置這些心頭至愛擺設。
採訪：比華利