來自80年代樂壇嘅黃翊，離開樂壇超過20年，現年50歲嘅佢，去年應邀參與《流行金曲50年》演出，再次演繹昔日金曲黃昏戀人、哭著笑、一世濃情，令大家嘅集體回憶返晒嚟！

噚日黃翊喺facebook宣布，將於10月23日喺九龍灣展貿，舉行一場《黃翊最愛的你演唱會2018》，雖然過去一年佢唔止一次做演出嘉賓，但講到真正騷於自己嘅演唱會，對上一次已經係92年嘅事，足足相隔咗26年！《蘋果》恭喜黃翊舉行個人演唱會，佢連聲道謝之餘，講到今次演唱會都好興奮。佢話：「演唱會開始籌備咗3、4個月左右，其實上年出番嚟之後，已經有人揾我，話想同我搞個演唱會，但嗰時真係無乜信心，所以推咗，到之後再有人揾我，嗰時都知道係想搞番個演唱會，但傾傾下又好似唔係好啱咁，所以冇搞到。」

黃翊又話：「今次合作嘅主辦商其實都好有緣份，佢係我20幾前成日做騷嘅一個主辦人嘅囝囝，佢已經長大成人喇，仲有自己嘅公司，佢好有誠意想揾我開演唱會，咁大家就一拍即合。」至於演唱會嘅Rundown，黃翊透露大方向傾咗，自己都定咗想唱乜嘢歌，但細節仲有好多嘢要修改，所以要開好多會。」

精選娛聞，喺晒《娛果》
http://fb.com/appledailyent