最近有關內房股的負面新聞層出不窮，新近有一單喺澳門傳過來嘅消息，指一隻去年底成功在港上市嘅內房股，老闆外表官仔骨骨，吸引到好多城中富豪同佢做朋友，但原來佢係「爛賭二」一名，喺澳門賭場輸過億元，甚至有講法話佢輸咗十億元。據講，呢位內房股老闆除咗自己喺澳門豪賭，有時仲會跟其他內房股老闆一齊對賭㖭。
唔知係咪輸得甘，江湖傳聞，呢位「爛賭二」老闆最近向幾間金融機構及內地富豪以超高息借錢，想借廿幾、三十億元，佢用自己嘅股份做抵押，抵押方法又非常有創意，總之要令人估佢唔到。不過咁，佢隻股票最近好似食咗瀉藥咁，市值不斷下跌，佢啲股份都越來越唔值錢！
轉過另一個話題，講開內房股股價下跌，華華發現，眾多內房股當中，呢兩個月最積極回購公司股票來支持股價嘅內房股，係雅居樂（3383）和中渝置地（1224），雅居樂四月底至今回購咗接近7000萬股，令到股價可以企喺8、9元。目前好多內房股唔係籌錢，就係留番多啲錢喺自己口袋，肯低位回購嘅內房股都算係逆市奇葩。

神冠食字　灌腸、冠軍兼備

賭仔好多時迷信，又話改名又話盛咁想搶個意頭；估唔到有成30年歷史嘅神冠控股（829），改個名都會玩食字！
神冠創辦人、主席兼總裁周亞仙同華華講，「神冠」呢個名其實係食「順利灌腸」諧音，亦有「神州冠軍」嘅意思，仲食埋廠房所在地「神衝」個舊地名㖭！
周主席話，其實神冠79年成立時唔係叫神冠，只係好簡單直接咁叫做「吳州蛋白腸衣」，之後用咗10年時間做科研，到90年先開始將產品推出市場，但由於技術唔夠好，啲腸衣一浸落90度嘅熱水就爆晒，要再用多幾年時間，先搞掂呢個問題。
周主席話，公司喺大約93年時改名做神冠，之後雖然一路仲蝕足10年，去到03年先開始有錢賺，但都叫做順風順水。周主席笑笑口話，公司賺錢係因為技術提升咗，同改名無關，若果改名真係咁勁，佢一定會日日同公司改名喎。

周刊致歉　賽迪信譽得保

所謂唔怕生壞命，最怕改壞名，名呢樣嘢係好緊要嘅。
但喺財經界打滾，名堂就不及信用重要，一時三刻未打出名堂，唔緊要，只要有信用，名同利遲早都會自動行埋嚟。近嚟專做上市顧問嘅香港創業板公司賽迪顧問響大陸就傳出「見錢辦事」嘅傳聞。
內地《理財周刊》更加以「證監會暴怒：賽迪顧問造假涉及100公司給錢就辦事」為題大造文章，篇文仲言之鑿鑿話「賽迪顧問被證監會正式立項調查」。雖然財經界人士一向都唔會「做義工」，不過，賽迪以研究及發表獨立研究報告為主，俾人立項調查就真係唔使撈。
點知原來係《理財周刊》報道出錯，賽迪梗係第一時間發聲明，仲話今日出版嘅一期《理財周刊》會刊發《致歉聲明》，指報道內容「賽迪顧問造假涉及100公司」內容與事實不符，並且收番嗰篇報道同埋向賽迪致歉。
賽迪響公告亦好似好大方咁接受道歉，仲建議其他傳媒要引以為戒㖭，雖然係名譽攸關，但係都唔使將條氣唔順呢個事實擺到咁明嘅。

RBS出app　實牛熊證價

科技日新月異，有時會為我哋帶嚟唔少不便，但iPhone呢嚿嘢雖然有好多人都話唔方便，香港地就大把人用緊iPhone，蘇格蘭皇家銀行（RBS）吼準呢個商機，推出iPhoneapp畀大家下載，係首家本港發行商推出窩輪同牛熊證應用程式。
蘇皇衍生工具負責人梁麗珊講笑咁話，呢個程式啱晒返緊工嘅投資者，偷偷哋喺公司實窩輪同牛熊證。
講番個程式，華華覺得最方便梗係個搜尋器，只要㩒幾個掣，自訂到期日或溢價折讓等，已經可以喺幾百隻窩輪入面，揀到心水對象。
蘇皇話呢個只係初版，下半年再推出加強版，事關已經有其他發行商做緊嘢，將會推出iPhone程式，無論點都好，日後投資者睇資訊，又多一個選擇。

李華華
mailto:[email protected]