皇家蘇斯達同埋馬略卡不愧為今屆西甲奇兵,喺禮拜日一隊主場砌低巴塞;一隊作客踢少個都攻到拉科氣咳,有捱眼瞓睇嗰場波嘅人都一定會豎起手指公讚好嘢。話時話,兩隊共通點都係有件威猛借將,無得頂。
今季西甲借將真係醒,高華斯域俾拉素借番去皇蘇之後成個天王咁。另外,借將倒戈重勁,由拉科借去馬略卡嘅彭迪安尼,禮拜日幫到隊波踢到識飛咁。皇馬借去桑坦德嘅梅里迪斯,之前倒戈亦有波入。
好多人爭論過,借將對番自己所屬球會唔應該落場,甚至有人話應該學英超咁,禁止同級球隊嘅球員借嚟借去,費事尷尬。不過,我求大俠覺得如果咁做,好多響大球會無正選踢嘅高質球員就會不見天日,亦難有奇兵出現,從觀賞角度睇無疑係一大損失噃。
愛滋日又關韋利事?
話說啱啱過去嗰個禮拜日(十二月一日)係世界愛滋病日,球壇人士都紛紛企出嚟宣傳防治工作,同埋反對歧視。當日意甲就有球員着晒支持口號嘅衫亮相,唔知外國通訊社係咪玩嘢,咁多隊唔影,淨係要將焦點擺響米蘭雙雄嘅球員身上。就算緋聞同志韋利同埋恩沙基真係有嘢,唔代表人哋有病啫,真搞嘢。
卡斯辛奴受教抵錫
意大利傳媒間唔中就會傳吓關於羅馬前鋒卡斯辛奴嘅負面新聞,例如早排就話佢同教練罵戰,同埋擅自離隊。聽講呢位足球小將受過教訓後已經精乖同埋謙虛咗。睇佢禮拜日對祖雲達斯入波後,無好似以往咁趾高氣揚,而係手指指對住傳個靚波畀佢嘅托迪,表示托迪功勞更大,真係孺子可教也!