周星馳電影相信無幾多個香港人未睇過，而且唔少戲中對白都琅琅上口，佢最近擬入股帝通國際（8220）台「戲」，唔知啲散戶又會點睇呢？
坊間消息紛陳，其中一則係指帝通正計劃在大陸發展商場，但強調周星馳並不參與營運。其實唔使問都知喇，星爺係超級大明星嘛，又點會親身去搞公司營運！呢種講法，對散戶去唔去炒呢隻股，實情有乜幫助呢？

散戶其實最想知，係某明星如果真係入股某間上市公司，隻股票究竟有無得炒？如果真係「有計」，有關幕後人等會點做？但睇番過往股壇歷史，個別股份以前都玩過「明星效應」，但炒完一「浸」就好快無晒影。散戶應否隨便跟消息高追，真係要自己衡量清楚咯。
港股結束多日跌市，但未能重越萬八關口，呢個禮拜散戶感覺個市「好難炒」，除非個市再度出現大成交式爆上，否則調整尚未完。
剛宣佈以現金1200萬元人民幣出售汽車儀錶零件廠股權的第一上海（227），昨日唔見多大異動，僅微升0.01元，收報1.09元。睇番第一上海自從上月初突破1元後，走勢一直徘徊於1元至1.25元之間，每次升上去都有沽壓。技術上，10日線已向下屈曲，似有跌穿20日線出現「死亡交叉」之虞，1元關口未必守得住，短線不宜沾手。
方星俠