現年65歲的艾迪原名陳小明，82年憑首部擔正的電影《邊緣人》榮登當年台灣金馬影帝。聲勢一時無兩，片約不絕，片酬如豬籠入水，換車多過換衫。風光過後隻身到台灣發展，性格決定命運，自言不懂做人的艾迪，拍攝電影《獵鷹》時不慎斷腳，成為收山之作，嘗盡冷暖。

早前艾迪回港為新晉導演李卓斌的電影《墮落花》開工，順道在當年《邊緣人》片中一個拍攝景點——果欄，接受本報專訪。他透露近幾年都會回港，緣起13年在台北出席完「金馬50」之後，就拍了翁子光的作品 《踏血尋梅》。此後，16年再拍了《獅子山下》，17年再拍翁子光的《風再起時》，去年再度跟郭富城合作，拍攝電影《六月的秘密》，他笑說：「其實呢幾年，每年都喺香港有工作。美國生活舒服得有啲悶，所以要返嚟俾導演虐待吓。」

艾迪82年成為金馬影帝，他笑言後生仔攞獎的意義就是開名車、片約不絕做主角。片酬的首期，已足夠買一部當時的飛仔車寶馬323i，他說：「嗰時從來冇諗過會冇工作，錢易嚟易去，就經常換車。有時候撞車，撞爛咗報銷咪買過部。到後來開始戲越接越少，就開始擔心，但我都唔知道發生乜嘢事，最後得咗抑鬱症。你喺娛樂圈，唔紅，就會鬱鬱寡歡。到你紅咗，又要經常保持高位，我試過有4日冇見報，就覺得自己有問題，就要造新聞，所以好大壓力。」

艾迪最後要到台灣發展，事後回想相信跟不懂做人，說話又得罪人有關，他說：「其實知道自己點解會突然跌落嚟，唔識做人講嘢又唔識轉彎。好似84年同某一個演員合作，合作得唔係好愉快。後來新藝城有一部電影，要搵4個演員，其中一個就是嗰個人，我就唔識講嘢，我冇話唔想同嗰個人合作，我只係直接同新藝城製片講『我唔想拍』。」自始之後，艾迪就沒有再接拍過新藝城的電影，他說：「呢啲咪不懂人情世故囉，連新藝城嘅戲都話唔想拍，之前合作過好多部戲，而且新藝城嗰時幾犀利你都知，其實我唔想同嗰個人合作。」其實早在討論區就有網友發帖講過，有指該部電影為《英雄本色2》，艾迪的角色最後由老闆之一的石天演出。早在拍《邊》片時自言不知死活，有一場戲要打真玻璃，完全沒有安全措施：「你而家畀幾多錢我都唔打。」

86年艾迪在香港事業跌至谷底，剛巧台灣有工作，他便到當地發展。最後拍電影《獵鷹》就出事，劇情要求他從一條漁船跳下去碼頭，落地時不慎兩隻腳眼就跌碎了，他說：「喺醫院做手術，3個月後一隻腳康復，另一隻腳要一拐一拐行。」到3年後做手術後才康復，回想受傷那段日子可以說是跌入人生低谷，見識到人情冷暖，他說：「嗰時好抗拒娛樂新聞，以前喺香港，直至到台灣，都會訂報紙，而家喺美國都會訂報紙。但退出之後嗰6、7年，每日收到報紙，第一件事就係掉咗份娛樂版。」馬死落地行，他在台灣加入了一間貿易公司，由影帝搖身變成業務助理：「當時真係好心灰，做業務助理邊做邊學，我同自己講認命。嗰時連行都行唔到，就算我送上門，走到攝影機前面，人哋都嫌我阻住，叫我走開啦。」慶幸同事都很友善，只是間中遭人白眼，但只可以忍。

由業務助理慢慢成為地區經理，最後跳槽到另一公司，轉到英國上班，亦因而認識了太太。在美國定居一住就20多年，他笑言三藩市的生活是慢活，買一份報紙都要開差不多15至20分鐘車。而在香港凌晨外出，隨處有東西吃。不過香港太擠逼，他笑說：「最逼就係紅綠燈，好多人逼埋一齊，綠燈時佢哋就走，不過啲人一路行會一路撳手機，而家香港社會就係咁。」

採訪：何永寧
攝影：林德雄
攝錄：廖達燊
場地提供：荃記菓欄

------------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9