騎士今日喺主場以90:109輸畀小馬後，開季成績係贏19場輸15場，暫時喺東岸排第5。坊間有唔少報道話騎士好可能同教練布拉特「分手」，不過球隊總經理大衛格芬就堅持話無咁嘅事。格芬話：「呢啲報道根本係子虛烏有，布拉特係我哋嘅教練，佢亦都唔會畀球隊炒魷魚，你哋唔好話球隊向佢投信心一票，因為佢根本唔需要我哋咁做。」說話就係咁講啦，不過讀者如果心水清嘅話，應該會發現好多時間一啲球隊高層出嚟講完嘢，話力撐主帥之後，啲領隊、教練跟手都會畀人炒，又睇下布拉特今次會唔會例外喇！