下午約六時半，由銅鑼灣出發到遮打花園嘅何浩文同龍小菌，上台齊齊獻聲，何浩文仲自彈自唱。龍小菌甫上台即大嗌:「梁振英下台！」何浩文就話：「香港加油，自己政府自己揀！」

同龍小菌做訪問時，突然下一大下雨，小菌即謂：「大雨都阻止唔到香港人，一定企出嚟爭取！」

談到學民召集人黃之鋒遇襲，龍小菌話:「下午嗰陣喺街站見到佢，依家佢未行到嚟，未證實到，但好似學民已證實咗係。呢件事好恐怖，佢係一個年輕人，一個召集人，如果為呢件事受攻擊，不能接受。」

龍小菌又謂：「我冇佢電話，問唔到情況，希望佢冇事，因為佢今晚仲有後續，自己都支持佢，因為年輕人要做呢啲好困難，家人會擔心，又受大人阻攔。」至於會否為此事作歌控訴？小菌就話：「暴力事件絕不容許，故大家先用7.1咁和平溫和方法表達訴求。」不過，方才黃之鋒於九時左右澄清，事發時約為今午約6時，警方喺冇預先通知下，於學民思潮街站對面設鐵馬，封鎖行車線，雙方發生衝突，黃之鋒表示當時未有作出任何挑撥行為，但被一名白衣警察推倒，話:「你要立即離開！」，不過黃之鋒未有受傷。

吳彤話:「依家好多人自我審查，但希望你哋唔好咁做，因為依家唔講，將來可能冇機會講。大家一齊爭取!」


【7.1上街】自己政府自己揀，直播7.1大遊行:
http://71.appledaily.com/