大陸歌手竇唯係王菲嘅首任老公，當年兩人愛得轟轟烈烈，王菲放低天后身份，甘願喺竇唯所住嘅北京四合院為男友倒痰盂，兩人喺1997年奉女成婚，可惜兩年後竇唯被爆同高原偷情，拖小三開記者會力數王菲「逼婚陰謀」，離婚後竇唯另娶高原，婚姻同樣兩年玩完！

事隔多年，近年好低調嘅竇唯，今日忽然喺社交網高調現身，親自回覆網民嘅提問：「竇唯目前在幹甚麼？」竇唯不但宣布將有新歌推出，更罕有地剖白自己嘅心態，唔想淪為笑柄：「最近錄音及製作的成果甚是喜人，我不會在意外行（雖善以偽卻一目了然）的噴口兒，只求莫使懂行者戳脊責罵淪為笑柄！那些不必要的口舌心思，如若借助知乎平台規避再好不過！外界貼給了我諸多標籤，這些，我都無法拒絕。我只是個音樂人，一個專注做音樂，專注做我認為的，真實的音樂的音樂人。」

竇唯上載一張彈結他嘅黑白相，唔介意暴露自己頭髮少、身型肥，低着頭專注彈結他嘅竇唯，全心投入音樂之中。去年12月竇唯連出兩張專輯《時音鑒》同《間聽監》，今年3月再出《山水清音圖》，似乎佢o依家嘅世界只有音樂，今年4月有網友影到竇唯孤獨搭枱食麵。