近期似乎得幾隻股票大家有留意，唔計騰訊（700）、平保（2318），其他都係藍籌。唔少二三線港股優質嘅話就早已跑出，變咗一線股，舜宇（2382）、瑞聲（2018）就係典型例子，而未叫一線嘅優質股，基數變高，波幅亦收窄，如申洲（2313）、安踏（2020）等等。由於騰訊、平保波幅已經及得上二三線股，想要刺激啲，贏快啲或輸快啲，就最多用衍生工具嚟變倍。好明顯，大家死買騰訊，係覺得呢啲係唔使用腦又有可觀回報嘅Easy money，實行「一鵝三吃」，於是對其他股就興趣不大。近期調整就話畀大家聽，除抽新股外，邊有咁多Easy money畀大家賺。

香港上市股份當中，新秀麗（1910）係少數受惠美國稅改，新秀麗每年盈利有穩定增長，上年純利增長三成，係4年來最佳，至於今年首三季經調整每股盈利增長3.5%。美國銷售佔整體接近四成，今年首三季錄得36.4%增長，呢部份可直接受惠稅改。

新秀麗預測2017年市盈率24倍，18年市盈率20倍，計及稅改因素嘅話，預測PE唔夠20倍，算係低水了，佢唔會大升，但喺資金避險環境下，新秀麗能逆市升，賺微利或許好過吓吓接飛刀。

美股強勢，A股反彈，港股一樣照掟，繼續成為全球提款機。目前形勢係，內地經濟復蘇速度減慢，資金流亦稍不利港股，但係美股氣氛理想，暫時未至於出現流動性危機，令股市快速急跌。話明提款機，冇人踩人之下，間中有反彈先引到人接貨，然後再派過，所以後市磨吓磨吓小漲大回，多過急跌，咁樣更容易玩死人。

晉佳

https://www.facebook.com/advanceguy1/