唔講唔知，原來好多財金界人士都鍾情跑步，股評人兼小牛金服CEO連敬涵(Kingston)仲聯同十幾個財金界人士成立跑步隊「Just Runners」，每逢大型比賽就會一齊參賽。佢哋上周六就一齊參加由新創建(659)舉辦嘅「勇跑地貌王」。小飛俠林燕玲同金融才俊葉浩文都係「Just Runners」嘅成員，不過佢哋應該係啱啱結完婚度蜜月，就冇參加今次比賽。

話明要跑地貌王，跑程當然唔輕鬆，Kingston 今次參加10公里男子個人賽，當中就係要跑大斜坡。 Kingston話最後成績係約1小時內完成比賽，比起過去六十幾分鐘先跑完，已經進步咗幾分鐘。不過，佢話其實今次比賽唔係發揮得最好，因為有傷風在身。至於邊個係冠軍？就當然係「Just Runners」嘅星級教練黎可基，用咗約37分鐘就完成賽事。

有付出就有收獲，今次跑步隊成績算唔錯，連敬涵同黎可基跑完比賽見到主持賽事嘅新創建行政總裁曾蔭培同執行董事麥秉良，當然少不免要影相「集郵」紀念一番。

蘋果財經，關心你飯碗
http://fb.com/appledailyatm