張敬軒今日以冒險家look出席《叱咤頒獎禮》記者會，軒仔表示手上個皮袋值萬幾元，噚日先至買，至於冒險家造型就係今朝先準備。

軒仔透露噚晚喺廣州演唱會返港，又謂今次係佢做演唱會以來，最開心及最好反應。軒仔表示當晚有個「經典位」，有指廣州有啲節目唔提倡用廣東話，不過軒仔廣州騷有八成都係廣東歌，而個唱最尾15分鐘，歌迷情緒更加高漲，齊齊大合唱。

其間軒仔問觀眾覺得廣東話裡面乜嘢最有特色，台下觀眾就話係粗口，軒仔表示自己唔識講，就叫觀眾講一個字嚟聽下，全場就和應兼好大聲講個「X」字，軒仔笑言好震撼﹑好厲害。問佢驚唔驚第時申請場地受影響？軒仔話唔驚，嚟緊一月份仲會去澳門開騷。

另外，講到今年頒獎禮獎項信心，佢話：「今年自己有三首歌上榜，對歌曲獎有信心，個人獎就隨緣，希望會有兩首歌得到獎。」