今年有兩件國際政治大事——美國11月嘅總統大選同埋英國6月就脫離歐盟舉行公投，兩件事睇落都同我哋好遙遠，但其實多少都會影響到環球市場情緒，甚至乎係個別股份，唔可以唔留意。
美國大選方面，市場擔心特朗普當選會不利中國經濟，因為佢喺政治同經濟上對中國嘅取態相當強硬，一旦入主白宮，對中國肯定弊多於利。至於英國，如果公投結果係「脫歐」，滙控（005）同長建（1038）呢啲喺英國有業務嘅本港上市公司，股價將難免受累。

要分析呢啲國際大事，筆者發覺除咗參考專家睇法，博彩公司所提供嘅賠率亦都好有啟示。英國博彩公司Ladbrokes不時會就呢類國際大事開出賭盤，上佢嘅網站就可以睇到賠率，而賠率高低直接反映唔同結果發生嘅機會率。
好似美國大選，根據Ladbrokes嘅賭盤，買希拉莉贏嘅賠率係1.44倍，買特朗普贏嘅賠率就有3.5倍，即係話多數人都賭氣勢如虹嘅特朗普，始終不敵政壇老手希拉莉。又例如英國「脫歐」公投，買「留歐」嘅賠率係1.36倍，買「脫歐」就賠3倍。換言之，多數賭徒都相信英國「脫歐」只係虛驚一場。
筆者唔係鼓吹賭博，賭盤賠率反映嘅結果唔一定準確，只係視呢啲賭徒智慧作民調以外嘅參考。其實除賭盤賠率之外，筆者亦都不時會去芝加哥商交所網站，睇利率期貨市場對聯儲局加息嘅預期機會率，因為某程度上利率期貨市場就係一個賭場，而呢班有如職業賭徒嘅交易員，睇法好多時都準過經濟師。

El.
本欄逢周二、五刊出