政府擺明要高價勾地，絕不放鬆，因為政府高層已經認同咗樓市好，經濟好，市民開心，唔鬧政府嘅大政策，地產商高價搶地，正中下懷，橫掂最後付鈔幫發展商買地嘅，就係買樓人士，發展商高買高賣，利潤不愁，唔怕鬥癲。
愁嘅竟然係分析Ｆ。賣地之後，佢與一班老友食晚飯，大家當然叫佢評論賣地結果。分析Ｆ話政府揸緊勾地，既搶錢減赤兼且托市，後果係未來幾年樓宇供應短缺，發展商少咗麵粉，就唔會做太多麵包啦，供應失調嘅話，樓價會脫軌上升，一年之內形成泡沫，既有泡沫，就會有爆破，因此分析Ｆ好驚九八年歷史重演（九六、九七狂升之後，九八年噩夢開始），嚴重打擊香港人。一個解救方法就係向地鐵、九鐵大開綠燈，傾補地價唔好十問九唔應，等地鐵、九鐵啲沿線地皮可以盡快推出市場，增加供應量。
聽咗佢嘅說話，左丁山有小人之心，諗諗吓，樓價會繼續上升，一年多之後，到達巔峯（亦係癲瘋），容乜易到咗○七年中，如果外圍有乜嘢衰嘢發生，觸發泡沫爆破，以樓價大跌市嚟迎接曾特首連任？曾先生咁聰明，好應該牛咁眼昅實，唔好去得太盡，引至物極必反啫。