花旗最新公佈嘅房屋數據令人失望，斷供個案大幅飆升，投資者憂慮樓價下跌冇止境，勢拖垮花旗經濟，花旗股市受壓顯著回落，自然不過。
3月18日聯儲局議息，越來越多人相信會減息3/4厘，減咁大幅度又點？𠵱家根本冇乜人相信減息可令經濟起死回生，花旗經濟起碼要捱多幾年困境，所以減息喺呢個時候唔會起到支撐股市作用，不過，如果議息之前花旗股市跌到一仆一碌，到時就可以借消息反彈。
仲有個幾禮拜先議息，𠵱家嘅markettalk係乜？前晚話有啲二線嘅保險公司唔掂，又話Ambac籌錢唔夠數，可能保唔住AAA評級。即係話嗰邊啲淡友好可能會用呢啲藉口繼續插個市，仲有就係分析員講緊啲投資銀行仲要繼續大幅撥備，最弊就係花旗政府同聯儲局都好似已經江郎才盡，冇乜板斧，難怪昨日香港班股民冇晒信心，恒指大跌841點收市，仲差501點就到22000關，如果跌穿埋1月嘅低位21709就真係NoEyeSee嘞。

喺度順便提吓隻新地（016），昨日跌咗5巴仙，成交大增，唔好以為兄弟爭拗只係「家事」，基金對呢啲不明朗嘅嘢好唔like，再唔出嚟講清楚，沽盤陸續有來。
中鐵C輪9825：中鐵建（1186）招股，股民換馬，中鐵掉頭跌，不過，𠵱家係捕捉短炒嘅機會，如果見隻中鐵守喺8元樓上，可買C輪9825，博中鐵建上市前後，中鐵會炒一轉，9825有效槓桿3.1倍，正股升上9.3元，隻輪可見18仙，正股跌穿7.8元止蝕。